香港打工仔扣稅計數機+報稅後補救教學
- Jet So
- 3小时前
- 讀畢需時 4 分鐘
雖然香港今年已經報完稅，但最近同朋友傾計...
先發現原來唔少朋友就算翻咗工n年，咁多年黎都報少咗扣稅項
例如MPF、專業會籍年費、同工作有關嘅個人進修開支、住宅租金、供樓利息...
結果，每年都白白交多咗稅
學校無教過、公司/稅局唔會主動提起咩野可以扣稅
翻工先無啦啦有份綠色表要填，唔識都可以話係社會造成
但為咗自己荷包著想，呢啲野都係要學！！
今次篇文除咗會拆解常見慳稅位，仲會有一個互動慳稅計數機
最後仲會教你追翻往年交多咗嘅稅
就算舊年、前年報漏咗，一樣有得追翻！最遠可以追到6年前
利申：本工具只供一般參考,並非稅務、投資或財務意見。稅例會變,每個人情況都唔同——採取任何行動之前，如有需要請諮詢專業會計師(CPA)。
基本香港報稅概念
「扣除」v.s.「免稅額」
扣除 (Deductions) | 你真金白銀付費嘅開支，稅局先肯埋單 保留單據，被查稅時用（如MPF、租金、捐款、進修費） |
免稅額 (Allowance) | 固定金額；唔使單據，符合資格就攞得。（例：子女、供養父母） |
兩樣都係計稅之前，喺你入息扣走。扣得越多，應課稅嘅部分就越少，要交嘅稅就自然越少
打工仔最容易漏嘅慳稅位
供養父母／祖父母免稅額
父母、祖父母、外祖父母（配偶果邊都計！）要年滿 55 歲、通常喺香港居住
只要你同佢哋同住至少半年，或者每年畀最少 $12,000 家用，你就攞得
60 歲以上、全年同住：每名 $100,000 免稅額
60 歲以上、冇同住但有畀家用：每名 $50,000
55–59 歲：金額減半
⚠️易中伏位：每位長者只可以由一個人申索
兄弟姊妹要傾掂邊個報，唔可以攤分。正常就係俾入息高、稅階高嗰個報，咁營成家慳最多
另外「俾家用」係要真係有俾（每年≥ HKD12,000），最好有轉數記錄，被查稅時用
扣稅三寶：自願醫保VHIS、合資格年金QDAP、強積金可扣稅自願性供款TVC
自願醫保 (VHIS) | 幫自己、配偶、仔女、父母等買認可自願醫保，每人最多扣 $8,000，受保人數冇上限 一家五口的話，就係 $40,000 額度 |
合資格年金 (QDAP) 強積金可扣稅自願性供款 (TVC) | 兩樣合共最多扣 $60,000 高稅階人士值得留意 |
⚠️易中伏位：VHIS 一定要係認可產品（保單有 VHIS 認證編號）；普通醫保、危疾、人壽唔算數
個人進修：考試費
同工作有關嘅課程學費，同埋專業／職業考試費，每年最多扣 $100,000
就算你無上堂、淨係去考試（例如CFA、會計師試、保險牌），考試費一樣扣得！
⚠️易中伏位：攞咗持續進修基金（CEF）或者僱主資助嘅部分，唔可以再攞嚟扣稅；只可以報自己出真銀果份
專業會籍及法定執業費用
如果你嘅工作必要、或者對份工有實際幫助，你交嘅專業會籍及法定執業年費係扣得架！例如HKICPA會員年費、工程師學會、醫生向醫委會、護士向護士管理局續領執業證明書
呢啲一年隨時幾千蚊起跳，17% 稅階慳返幾百蚊
⚠️易中伏位：稅局一般只接受一個學會嘅會費。揸幾個牌嘅話，揀同份工最相關同最貴果個報。要同你受僱工作有關；轉咗行、個牌用唔着嗰年就報唔到啦
租樓租金、供樓利息
住宅租金扣除 | 租樓一族恩物！你自住果層每年最多扣 $100,000 有初生 BB 同住，可加到 $120,000 |
居所貸款利息 | 一世人最多可以申索 20 個課稅年度 |
⚠️易中伏位：租金扣除嘅大前提係，你同配偶唔可以持有任何香港住宅物業，而且租約一定要打咗釐印。冇打嘅，可以補得，但可能有罰款
租關聯人士，例如阿爸阿媽層樓，係唔合資格
交咗稅先發現漏報扣稅項？可以向稅局追返
睇到呢度先發現「原來ＸＸＸ都有得免稅/扣稅」？
哭是沒有用的，可以問稅局追翻舊帳的！
情況A：啱啱收到稅單，覺得唔啱數
正式叫「反對評稅」。限期係稅單發出日起 1 個月內，用 IR831 表格或者自己寫信（eTAX 都交得），講明反對邊度、點解，附證明文件。
情況 B：交咗稅，先發現報漏咗（甚至漏咗好多年）
根據《稅務條例》70A：只要評稅有「錯誤或遺漏」，你可以喺該課稅年度完結後 6 年內書面申請更正。批咗，多交嘅稅就退返畀你。
課稅年度「Y/Y+1」喺Y+1年3月31日完結，所以第 70A 條嘅截止日一般係Y+7年嘅 3 月 31 日。例如2021/22 年度截止日，就係2028年3月31日——即係話，你依家仲追得返！
留意點：
退稅一般冇利息——你果幾千蚊擺喺庫房幾年，係唔會產生利息俾你嘅。所以越早發現、越早追係越好。
證明文件係關鍵：捐款收據、保費結單、租約＋釐印、學費單等等，全部最好留足 6 年。搵唔返的話，捐款可以問機構補發，保費可以問保險公司拎年度結單。