[加拿大稅務] TFSA投資咩好

加拿大嘅稅制同香港好唔同，例如加拿大有可以扣減供款當年taxable income嘅儲蓄戶口，專比人儲錢買樓（FHSA）/退休（RRSP）；香港邊有咁鬼多野...

今日想集中討論吓TFSA。TFSA無得扣taxable income，但係TFSA 內嘅增長，都基本上免稅。

點解係基本上呢？因為如果你投資外國股票（例如美股），你嘅dividend收入，其實係要交15％ withholding tax。

每個人嘅risk appetite、對市場嘅睇法、投資策略都唔同。今篇我會嘗試撇開呢啲主觀因素，從比較客觀嘅稅務角度，分析吓TFSA供咩好。

利申：呢篇唔係、亦唔構成任何tax advice或投資建議。我唔係加拿大會計師，有咩稅務疑難請向加拿大專業會計師求證。

---

首先，簡單介紹吓TFSA-

• 免稅儲蓄帳戶；旨在幫助加拿大居民儲蓄和投資，同時享受稅務優惠

• TFSA內投資增長基本上免稅，不論係提取，定係留在帳戶內

• 每年會有一個contribution room；2023 CAD6,500、2024 CAD7,000、2025 CAD 7,000

• 供款超過contribution room會有罰款

• TFSA可以投資多種資產，包括： 股票、ETF、債券、GIC、基金等

---

今次會討論嘅資產對象：

1. 加拿大債券

2. GICs

3. 美股

4. 加拿大股

5. 美股ETF

(1) 加拿大債券  、(2) GIC

兩者都係成約時，已經cap咗maximum gain。增長部分係免稅，但由於maximum gain已cap，變相你享受到嘅免稅上限都已經fix咗。

例如你同銀行做咗1年 5%p.a. GIC - 平時呢5%嘅利息收入，係會計落你taxable income去打稅；假若你喺TFSA買GIC，呢5%就唔需要打稅。

但係，你慳到嘅，就只係5%。

如果我地認為市場係一個上升趨勢，其他投資（例如股票）回報係會高於5%的話，用TFSA買債券同GIC，其實係有點兒浪費，未能夠將TFSA最大嘅功用發揮到出黎。

(3) 美股 、(4) 加拿大股

買個別公司股票的話，股價可能上落好大，high risk但都可能係high return。TFSA本來就唔係比人短炒，係鼓勵長期持有。

如果你睇好一間（或者幾間公司）嘅長遠發展、覺得股價potential gain好大的話，可以考慮吓用TFSA黎投資，因為你賣出股票時嘅資本增值（capital gain）係免稅嘅。

由於potential gain係無上限，所以用TFSA投資個別公司股票，capital gain免稅額度都係無上限。

但係，針無兩頭利 - 個別公司股票可以升到癲，亦都可以跌到趴街。只係買一間至幾間公司嘅股票，可以potential gain好大，亦都可以係輸錢。買咩股票好、點樣diversify等等，就要視乎你個人嘅投資選擇同埋風險管理。

(3) 美股

[Capital Gain] 美股長期以來顯示出強勁嘅增長。由於TFSA內嘅capital gain係免稅，長遠而言有可能慳到相當可觀嘅capital gain tax

[Dividend] 根據加拿大與美國的稅務協定，加拿大稅務居民於美股嘅股息收入，係會被徵收15% withholding tax（not recoverable)

(4) 加拿大股

[Capital Gain] 參考過往紀錄，加拿大股票長期增長潛力可能不如美國股票。雖然TFSA內嘅capital gain係免稅，但一般而言，數目上可以慳到嘅capital gain tax可能比唔上美股

[Dividend] 股息免稅

(5) 美股ETF

 ETF 依賴所投資行業或市場指數。簡單啲講，ETF係獲美國證監會認證，跟蹤/模擬/對應某指數表現為主要投資目標。背後嘅背後，好多時就係一籃子公司股票嘅股價表現。例如SPDR S&P 500 ETF，就係追蹤緊S&P 500 Index嘅表現。

同投資個別公司股票相比，因為ETF係追蹤緊一堆公司嘅股票，所以一般而言，風險都係比較分散；然後回報都係會攤分咗。賺嘅未必有個別公司股票咁多，但蝕時都未必咁甘。

[Capital Gain] 美股長期以來顯示出強勁嘅增長；同投資個別股票相比，未必賺最多但都未必蝕最多。由於TFSA內嘅capital gain係免稅，長遠而言有可能慳到相當可觀嘅capital gain tax

[Dividend] 根據加拿大與美國的稅務協定，加拿大稅務居民於美股嘅股息收入，係會被徵收15% withholding tax（not recoverable)

---

總結

• 稅務效益

加拿大股 = 加拿大債券 = GIC = 非派息美股 = 非派息美股ETF > 派息美股 = 派息美股ETF

要留意，稅務效益高 唔一定等於賺得最多錢落袋。

雖然美股同美股ETF dividend係要收15% withholding tax，但如果你買嘅係唔會派息嘅美股（例如Snowflake)，其實果15%稅是唔關你事的。

另外，雖然加拿大股票係capital gain同埋dividend都免稅，但都唔代表佢嘅回報，係可見將來，好有可能超越到美股。有可能計埋dividend 15% withholding tax，美股都仲係跑贏加股。

最後就係用TFSA投資債券同埋GIC... 雖然增長係免稅，但佢增長係有限。對我黎講，佢嘅唯一好處就係（原則上）保本穩賺。但如果你本身都有投資吓股票等有風險嘅資產，就不妨考慮吓用TFSA黎做呢方面嘅投資。（股票價格可以急升或者急跌，過往嘅表現並非未來表現嘅指標）

加拿大都無咩幾樣野係免稅，難得有個TFSA可以基本上免稅地做吓投資。希望呢篇文幫到大家了解多啲TFSA。

首尾呼應：每個人嘅risk appetite、對市場嘅睇法、投資策略都唔同。適合人地嘅投資組合，未必等於適合你。最緊要認識多啲個市場，就可以慢慢搵到適合（宜家+將來的）你嘅選擇（好似係）