TFSA提款後 供款額會點樣計?

好多近年定居加拿大嘅朋友，聽得最多/供得最多嘅，都應該係TFSA(Tax-Free Savings Account)

之前寫過[加拿大稅務] TFSA投資咩好，今次就講吓從TFSA提款後，供款額度係點樣計

雖說TFSA係設計俾大家做長線投資，但可能有時應急/買車買樓之類，需要大筆啲嘅資金，從TFSA提款，都係一種可以考慮嘅資金籌措手法

但攞完錢出黎，供款額會唔會無咗？定係幾時會加翻？加翻的話，額度會係幾多?

今日就同大家睇清楚佢！

利申：呢篇唔係、亦唔構成任何tax advice或投資建議。我唔係加拿大會計師，有咩稅務疑難請向加拿大專業會計師求證。

---

TFSA提款後，額度幾時加翻？

翌年1月1日

千祈唔好以為從TFSA提款，可以轉個頭同一年就入翻錢落去，net off當無事發生

CRA並唔係咁樣計的！！

假設你過往無剩餘供款額（contribution room），再2026年1月已經供爆2026年上限CAD7,000

如果你4月從TFSA提款買車

同年7月有閒錢，想入翻錢落TFSA?

NOOOOO!!! 千祈唔好！

TFSA提款後，額度係會加翻，但唔係即年生效，而係翌年1月1日先生效

以上面例子為例，對CRA黎講，你1月時已供爆2026年TFSA，往年亦無contribution room用剩

如果你2026年7月再入錢落TFSA，就會變成over-contribution

呢個over-contribution數目，會被CRA每月以1%罰款

想同年入翻錢落TFSA？

• 如果你每年都供好供滿，提款後就唔好同年入翻錢落TFSA

  • 最快都要下年1月1日先

• 如果你仲有未用供款額，就可以供款

  • 但要留意，呢個其實係消費緊你以前未用盡嘅額度，而唔係因為提款而重生嘅額度

---

TFSA提款後，額度會加翻幾多？

你今年從TFSA提款幾多，就會喺下一年加返幾多供款額

假設你過往冇剩餘供款額，再2026年1月供滿TFSA戶口CAD7,000

4月時，你從TFSA提款CAD10,000買車

咁2027年時，你嘅TFSA contribution room就會係：

(1) 官方設定嘅2027年度供款上限，加(2) 2026年提款額CAD10,000

要留意，TFSA提款後加翻嘅額度，只係關乎你提取咗幾多錢

而唔係你之前供咗幾多錢入戶口、或者戶口入面賺/蝕咗幾多錢

簡單啲諗，提款後可以加翻嘅額度，就好似一條橡筋咁

係會基於你提走幾錢而被拉闊，但特別之處係呢個伸展會延遲於出年1月1日發生

如果你每年供爆TFSA，包括今年；然後今年從TFSA提款後，即年再塞錢入TFSA

咁就已經打爆咗可供款額度＝拉爆條橡筋

懲罰就係會被CRA每月罰你超出供款嘅1%，直至你拎走超出嘅供款

如果CRA認為你故意超出供款上限，更有可能衍生其他稅務問題

---

其他關於TFSA提款常見問題

1. 喺TFSA戶口入面賣股票，算唔算提款？

   唔算。只要啲錢仲留喺TFSA account，就唔係提款。只有將錢由TFSA轉移至其他戶口先算提款。

2. TFSA提款要報稅嗎？

   唔需要。TFSA提款唔係taxable income，唔使報稅。

   除非你超出咗供款，就要盡快拎走excess contribution，同埋另外同CRA處理：If you over-contribute to a TFSA - Canada.ca

   

3. CRA戶口內嘅TFSA contribution room數字可唔可靠？

   唔可靠，佢唔係實時更新。自己keep record，計清楚條數最實際。

4. TFSA資金由一金融機構，轉去另一金融機構，算唔算提款？

   1. Direct Transfer（金融機構對金融機構直接轉）：唔算提款

   2. Indirect Transfer（你自己提款出嚟，再入落新金融機構）：提款！

   簡單黎講，就係你提出指示，由得兩間金融機構溝通搞轉錢，錢唔好經自己手，就最安全。

   詳細解釋可以睇：Requesting a TFSA transfer - Canada.ca

   

   
   

---

總結

1. 提款額度於翌年 1 月 1 日先復活

雖然提款後額度會加返畀你，但 CRA 規定係要等到翌年 1 月 1 日先會生效。

如果你無剩餘供款額，今年從TFSA提款之後，同年又入返錢，就會變成 Over-contribution

2. 提款後翌年加幾多額度，係基於你「提款銀碼」

TFSA 額度最特別嘅地方，係出年加翻俾你嘅額度，係根據你實際提款嘅金額，而唔係計你當初供咗幾多本金

如果你投資有道，喺戶口賺咗錢之後提款。提走幾多，出年就加返幾多，變相幫你拉闊咗個供款空間

3. 唔好超額供款，否則每月罰 1%

如果你唔小心「拉爆條橡筋」超額供款，CRA 會每個月罰你超出供款嘅 1% ，直至你拎返走啲錢。最好自己 keep 好 record，唔好完全信晒 CRA Portal，計清楚先好入錢。

利申：呢篇唔係、亦唔構成任何tax advice或投資建議。我唔係加拿大會計師，有咩稅務疑難請向加拿大專業會計師求證。